ياسمين عز تقدم فقرة للسيدات عن طريقة لفة الحجاب: ربنا يهدينا جميعا
هاجر عاطف
قدمت الإعلامية ياسمين عز، فقرة عن طرق لف الطرحة للسيدات والفتيات في برنامجها كلام الناس عبر شاشة MBC مصر، مشيرة إلى أن الفقرة كانت ستقدمها متخصصة، ولكن لظروف خاصة ولضيق الوقت قدمتها بنفسها، وقدمت لجمهورها أكثر من لفة وشرح كاف لكل منها.
ربما يعجبك
وقالت ياسمين عز: قررت أعمل فقرة عن الحجاب في برنامجي ولكن متخصصة الحجاب اتأخرت، وقررت أعملها أنا والحجاب أحلى حاجة في الدنيا وربنا يهدينا جميعا، ومفيش حاجة اسمها موضة في الحجاب.
وأضافت ياسمين عز: كل أمهاتنا بيلبسوا حجاب، وأنا شاطرة أوي في لفات الحجاب، والحجاب دا من أحلى الحاجات في الدنيا وربنا يهدينا جميعا والفقرة دي قررت متتلغيش وهعملها أنا، وتقبلوا مني إني بعملها على قد ما بقدر.
واعترضت ياسمين عز على أسعار الطرح، قائلة: أنا تفاجأت بالأسعار وبسمع أسعار فلكية وأعلى من 350 جنيه ولازم يظبطوا أسعار الطرح، وهل فعلا البنات بيشتروا بالأسعار دي؟
ونصحت ياسمين عز الفتيات بارتداء تاج على الحجاب قائلة: لازم تعملي اللفة دي وتحطي التاج على الطرحة عشان خطيبك محمد ومامته تشوفك تقول مفيش حد زيك في الفرح، وأراهنك كل الناس هتقلدك.
وتلقت ياسمين عز اتصالات من جمهورها وشاركتهم الفقرة، وقالت لها إحدى المتصلات: ما شاء الله عليكي كل لفات الطرح جميلة، أنا بحبك أوي وكل البنات هتقلدك، بس ليه مش بتتكلمي عن خطيبة فتحي وأيمن؟
وردت ياسمين عز: خطيبة فتحي وأيمن وكل الأسماء معانا، والبنت تحط التاج بس وتقعد جنب حماة الفرعون وكل حاجة هتكون كويسة.
وقالت ياسمين عز بعد ارتدائها الحجاب: لما لبست الطرحة التركي بقيت شبه الأتراك بس أنا مصرية بيور وبفتخر أني مصرية، وهفضل قاعدة في البرنامج لحد ما أكون كركوبة وعندي 70 سنة.
